Stolt af mínum skóla: Columbia háskólinn hristir upp í fólki sem vill hefta málfrelsið - stundum

Ég er að springa úr stolti Skólinn minn stendur alltaf fyrir sínu! Skoða öll sjónarmið og dæma svo. Sama hversu fáranlegt það kann að hljóma er betra að hlusta fyrst og mynda svo skoðun.

Það er líka gott að þekkja óvini sína og til þess þarf að leyfa þeim að tala og observera þá í real life....og það gerðist í skólanum sl. mánudag. Tugir þúsunda manna hlýddu á orðaskak Ahmadinejad og Lee Bollinger.

Á meðan flestir vita að Ahmadinejad hefur verið gagnrýndur fyrir skoðanir sínar og fullyrðingar er Lee Bollinger gagnrýndur fyrir tvo hluti:

1. hann er gagnrýndur fyrir að hafa leyft Ahmadinejad að tala á amerískri grund, enda er hann sérfróður um tjáningafrelsið og lýðræði og hefur eflaust fundist spennandi að fá Íransforseta til viðræðna.

2. Hann er gagnrýndur af mörgum fræðimönnum fyrir að hafa farið of harkalega og dónalega að forsetanum auk þess sem hann svaraði sjálfur engum spurningum.

Flott að gagnrýna.....gaman að því.....en framkvæmdin er yndisleg og skólanum til sóma enda stendur hann undir gildum sínum og undirstrikar það með þessum fundi.

Að kaupa vöru en fá ekki að skoða hana fyrst!

Mér er það með öllu ómögulegt að skilja afhverju maður fær ekki að skoða GSM símana áður en maður kaupir þá? Myndir þú t.d. kaupa þér tölvu, iPod eða sjónvarp án þess að fá að prufa tækið áður?

Myndir þú kaupa þér gallabuxur án þess að fá að máta fyrst? Eða bíl án prufukeyrslu?

Heldur Síminn, Vodafone, raftækjaverslanir og fleiri söluaðilar að maður sé fær um að meta hlutinn án þess að prufa hann? Og hvernig á það mat að fara fram? Með hugarorkunni?

allavega er þetta ástæða þess að ég kýs að eiga viðskipti við raftækjaverslanir erlendis.....ég fæ að skoða vöruna áður en ég kaupi hana.

Bruce Springsteen kominn aftur

Það er óhætt að segja að þetta sem algert come-back hjá kallinum. Þvílíkt konfekt fyrir rokk aðdáendur.

Njótið vel!

http://www.youtube.com/watch?v=UhmQLFqpG_w

Með lífrænt ræktað kvef

God hvað ég er orðin þreytt á þessu. Svissaði yfir í lífrænt fæði í vor og er nú með kvef í þriðja skiptið á fjórum mánuðum. Í þetta sinn er kvefpestinn búin að endast á þriðju viku.

Greinilegt að kroppurinn er ekki alveg að þola þetta óeitraða fæði.

Á einhver ráð áður en ég breytist í lífræna sveskju?

ó my lord - ó my Stefan

Ég er afskaplega ánægð með lögreglustjórann okkar. Fram er kominn sannkallaður leiðtogi sem ryður brautina fyrir nútímalegum hugmyndum um tímabundið lögregluríki til þess að koma á reglu hér í bæ enda ótækt að miðbærinn sé andsetinn um helgar af illum djöflum.....

Einu sinni var það mín kynslóð - svokölluð ónothæf X-kynslóð (alveg glötuð á alla kanta samkv. einhverjum kalli úti í heimi) sem réði lofum og lögum í miðbænum um helgar. Við skelltum í okkur tequila og sítrónum, röfluðum, ögruðum einstaka lögreglumanni, ældum og fórum svo heim - gerilsneydd af minningum það kvöldið. Ég býst við að lögreglunni hafi þótt við frekar aumkunnarverð - enda alltof full til að gyrða niðrum okkur áður en við pissuðum - nei djók...kannski bara stundum.

Nú er þessi gagnslausa X-kynslóð (sem by the way er rík og stjórnar bönkunum hérna og borgar helst engan tekjuskatt af því hún er svo gagnslaus) skíthrædd að fara í miðborgina enda hefur hlandpollunum fjölgað til muna. Tilefnislausa ofbeldinu hefur líka fjölgað og öruggara er fyrir stelpu að vippa sér úr að neðan úti á götu fyrir allra augum frekar en að taka þá áhættu að gera það fyrir luktum dyrum og eiga þá á hættu að verða fyrir nauðgun - án vitna í þokkabót. Vitnin væru þó nokkur ef slíkt henti á laugaveginum.

Mér finnst þó afskaplega fróðlegt að fara niður í bæ og skoða mannskapinn. Um daginn var t.d. mikill galsi í liðinu og hópur fallegra stúlkna gerði sér flissandi að leik að setja bjórglösin á götuna og biðu svo eftir brothljóðunum þegar bílarnir keyrðu yfir herlegheitin. Já sannkölluð hrekkjusvín.

Í sumar varð í vitni að því þegar ungur útúrdópaður strákur labbaði út á miðju Austurstræti með slátrin úti og meig yfir sig allan. Ég gat ekki annað en skellihlegið......

En þrátt fyrir allt, þá er það alveg rétt hjá Stefáni okkar að við sættum okkur við of mikið af rugli. Að sjálfsögðu er þetta ekkert eðlilegt, ofbeldið, hlandið, occational kúkur, brotin glös og öskrin. Hvað þá virðingaleysið við lögin og reglurnar.

Takk Stefán - þú ert Rudolph Giuliani Íslendinga!!!! 

5 viðvaranir, 1 áminning

Bringuhár Rúnna Júll

Afsakið en hvað er þetta eiginlega með fráhnepptu skyrtuna á gamla manninum í blaðaauglýsingunum.....á þetta að vera flott?  

Byrjað að selja miða á tónleika Rúnars í Laugardalshöll

Meiri læti = stærra typpi?

Maður veltir því fyrir sér afhverju sumir bifhjólamenn láta setja kút á hjólið sem gefur frá sér meiri hávaða en leyfilegt er. Það er engu líkara en einhverskonar tíska sé í gangi: Því meiri hávaði - því meiri töffari.

Ég líki þessu við að bifreiðaeigendur geri gat á kútana sína og keyri um voða montnir.

Það má svosem einnig líkja þessu við páfugl sem reynir að vekja athygli á sér með því að breiða út fjaðrirnar.

Mér er sagt að þessir hljóðkúta-monthænur þarna úti séu nú oft karlar um og yfir fimmtugt.

Það má því draga þá ályktun að "grái fiðringurinn" hafi breyst í "ærandi fiðurfé með athyglissýki".

Ég hugsa stundum þegar ég sé karla sem breiða úr sér á þann hátt að limirnir standa gleiðir út frá búknum hvaða steitment sé í gangi.......sama gildir hér um ærandi hávaða frá mótorhjólum. Meiri læti = stærra typpi undir fiðurfénu? Spurning.

Karlar: Bannað að pissa standandi eftir klukkan 10 á kvöldin!

Það er alltaf jafn áhugavert að lesa um nágrannaerjur sem koma upp á borð húseigendafélagsins. Það er mikið hvað fólk kvartar og hvað það finnur sér til dundurs til að kvarta yfir.

Mikið rosalega hefur það mikinn tíma til þess að finna út yfir hverju á að kvarta. Það er víst alveg dæmigert að kvarta yfir trjám nágrannanna og girðingum. Í fjölbýlum er helst kvartað yfir lykt. Þannig kvörtuðu margir í einum stigaganginum yfir lykt sem barst úr einni íbúðinni er íbúi þess var að elda sér mat. Aðrir kvarta yfir grillunum og ég veit til þess að í sumum löndum er búið að banna grill á svölum með öllu.

Þá er eitthvað sem heitir "sjónmengun". Ég rakst á þetta er ég flutti inn í minn stigagang. Fyrir utan hvað þetta er afskaplega sveigjanlegt orð virðist fólk nota það til þess að túlka ýmsa hluti. Það er bannað að vera með dósir og þvott úti á svölum. Það er sjónmengun. Að mínu áliti ætti þá líka að banna gamla karlinn við hliðina út á svölunum hjá mér þar sem hann er svo sannarlega ljótur og myndi því flokkast undir sjónmengun.

Gamall karl kvartaði yfir því að stigagangurinn minn væri ekki kominn með gardínur! Hann var svo yfir sig hneykslaður að hann hellti sér næstum yfir nágrannakonu mína. Þessi sami karl fann svo upp á því að góla á börnin sem voguðu sér að vera á hjólabrettum á göngustígum nálægt íbúðinni hans.  Vildi hann banna hjólabretti.

Kona kvartaði yfir reykingum nágrannanna á svölunum. Nágranninn vildi ekki reykja inni heldur úti. Hann fór því að reykja inni. Sama kona kvartaði þá yfir megnri reykingalykt á stigaganginum.

Það verður skemmtilegt að fylgjast með þróun þessara mála. Kannski get ég bannað bíl nágrannans þar sem hann skemmir heildarlúkkið á bílaplaninu. Ég get kannski skikkað feita nágranna í megrun og of mjóa í fitun þar sem þeir sjónmenga er þeir fara út í garð eða á svalirnar.

Kannski get ég ráðið því hvernig gardínurnar í stofuglugganum hjá nágrannanum eru á litinn ef ég væli og kvarta nógu mikið yfir litnum á þeim.

Kannski verður þetta eins og í Sviss þar sem karlar mega ekki pissa standandi eftir klukkan 10 á kvöldin til þess að angra ekki nágrannana. 

Hótanir og svívirðingar - eru Íslendingar gengnir af göflunum?

Afhjúpun firringar hefur ollið heilabrotum  hjá mér upp á síðkastið. Er hugsanlegt að svo margir klikkaðir Íslendingar séu til? Eða afhjúpast klikk-firringin með tilkomu internetsins? Er hugsanlegt að stressið sé svo mikið á fólki að það leyfi sér í auknum mæli að vera með hótanir og svívirðingar hér og þar um höfuðborgarsvæðið? Ætli þetta sé nýtt fyrirbæri í kúltúrnum okkar?

Varð vitni að nokkrum uppákomum milli ókunnugra um helgina. Í blíðskaparveðrinu virtist brúnin þyngjast á taugaveikluðum einstaklingum þarna úti.

Fór í sund. Gamall karl leggur í stæði og par um fimmtugt klikkast. Ég heyri þar sem hurðum er skellt og öskrin standa á gamla manninum. Þau ásaka hann um að hafa "stolið" bílastæðinu. Hann segir að hann hafi ekki vitað að þau ætluðu að beygja í stæði þar sem þau gáfu ekki stefnuljós. Þau kalla hann dóna, hálfvita, segja hann ruglaðan og hóta svo að rispa bílinn hans.

Fór á Ægisíðuna í göngutúr. Karl um fimmtugt er með nokkra hunda sem hann sleppir lausum. Skokkarar fara framhjá og einn þeirra er augljóslega ekki sama um að hundarnir séu lausir (enda er það bannað). Hún bendir hundaeigandanum kurteisislega á að hundarnir eigi að vera í bandi. Hann klikkast og hellir svívirðingum yfir skokkarann, segir hana hafa gleymt að taka inn pillurnar sínar og fleira.

Strákurinn minn fer á Miklatún að leika sér. Kona á sextugsaldri hleypir hundinum sínum lausum. Strákurinn minn gerir athugasemd við það enda (vegna reynslu sinnar) er hann logandi hræddur við þá. Konan fer að stríða honum, segir hann aumingja að vera hræddur við hunda.

Kona leggur í stæði fyrir fatlaða í Kringlunni. Bíllinn hennar er ekki merktur og gengur hún á pinnaháum hælum í burtu. Hjón á bíl (með bílastæðamiða fyrir fatlaða) gera athugasemd við konuna. Hún stappar niður löppunum og æpir og öskrar svívirðingum og rýkur svo haltrandi í burtu.

Óupptalið eru svívirðingarnar, hótanir og leiðindin sem fólk setur inn á bloggin hjá öðrum.  

Hvað veldur? Hefur þetta alltaf verið svona?

Bílagemsar og aðrir blindir ökumenn

Í góða veðrinu síðustu dagana (amk hér á SV horninu) hef ég farið mikið út að ganga og njóta þess að fljóta með mannfólkinu. Maður nýtur hverrar sekúndu því aldrei er að vita hvenær sólardögum lýkur.

Það er eitt sem ég hef tekið eftir við þessar göngur mínar. Yfirleitt, já yfirleitt, þegar ég ætla að ganga yfir á grænum göngukalli fer einn bíll yfir á skærrauðu. Og alltaf, já alltaf, er viðkomandi í símanum.

Mér hefur sýnst svo sem þessir bílagemsar taki ekki einu sinni eftir því að þeir hafi farið yfir á rauðu - hvað þá að þeir hafi næstum keyrt yfir eitt stykki konu og og eitt stykki barn......

Ég dreg þá ályktun að við það að tala í síma þurfi fólk oft að "visualize" ýmislegt sem fer fram í samtalinu. Til dæmis ef skipuleggja á eitthvað tiltekið eða þegar vísað er til leiðar. Ég dreg einnig þá ályktun að þetta sé ómeðvitað ferli, þ.e. að við tökum ekki eftir þessu þó við vitum af því.

Af þessum ályktunum er eftirfarandi niðurstaða:

Bílagemsar eru álíka hættulegir í umferðinni og blindir bílstjórar (sem væntanlega eru ekki til)